一年容易又圣诞，一大班朋友聚会，点少得零食？一般嘅零食食到厌，不妨试下今期为大家介绍嘅六款零食，当中最杀嘅梗係今期大热双绿系列！就係绿茶可乐，早排便利店一出就卖到断晒，唔紧要，我哋搵到更厉害嘅日本金赏版！仲有堂饮版添！

1.日本金赏绿茶可乐（推！）

上期讲过香蕉味汽水，今次就讲吓绿茶可乐。不过可以放心，呢只新味係得金奖之作，饮落比一般可乐多气好多，既饮到可乐味，又饮到淡淡绿茶味，两者出奇咁夹，余韵清新，贵少少都一定要试！

OK 便利店

电话：2991 6337

如果惊我哋介绍完都好快断市，可以考虑去旺角呢个抹茶甜品店试试新推出嘅抹茶梳打，有Blogger试饮过大讚有抹茶味之余唔会过浓而苦涩，甘香又清甜！

GUM”JENG” x御前上茶

•地址：旺角广华街13号广辉大厦地下4至5号舖 (显示地图)

•营业时间：7pm-11pm

2.懒人恩物即沖燕麦

睇盒面介绍话係红豆汤，点知沖出来是燕麦居多，不过唔紧要，反正都係好食又有益，最抵讚係不会太甜，反而粒粒杏仁、红豆、提子、燕麦的 原味仲喺度，感觉更加健康。

Aeon(康怡店)

电话：2884 6888

3.像真度高饭焦糖

天气冻，煲仔饭的饭焦令人回味，估唔到糖都出饭焦味，贪新鲜即管一 试，竟然有惊喜喎！入口除咗有甜味，仲有少少带苦的焦香，有点似咖啡糖，之后又会有阵阵饭味渗出，一粒糖做到咁像真又多层次，好嘢！

Aeon(康怡店)

电话：2884 6888

4.极重口味大虾粉丝（最伏！）

出街食大虾粉丝煲，总係会油到腻，呢个叮叮粉丝虽然係非常乾身，选用的南美白对虾亦无霉味雪味，可惜泰式香料落得太多，变成好闻唔好食，而且食落非常鹹，建议配一碗白饭，係重口味人士专用。

Aeon(康怡店)

电话：2884 6888

5.北海道土产朱古力

呢款粟米朱古力，係人都知是北海道名物，粟米有粟米香，朱古力唔係死甜都係常识吧！独立包装最方便储存，今期Sogo做紧周年感谢祭做紧特价，买定摆喺公司，一定食唔停口呀！

崇光超市(铜锣湾店)

电话：2833 8338

6.冬日限家甜味薯片

圣诞将至，卡乐 B 就出咗只法式焦糖炖蛋味薯片来应节，记者率先试味，觉得食落先鹹后甜，最后有一阵奶油香，喜唔喜欢就见仁见智，最抵讚嘅係包装有新意，一款口味有四款包装设计，每款都印有不同讯息，其中一款係留白的 Message box，可以自己写嘢，够浪漫。

12月头于各大超市、便利店及零售店有售