嚟紧星期五C3日本动玩博览（C3HK）2017就开幕，动漫电玩迷例牌都要入场打卡，之后有冇钱消费因人同利是钱而异。但到时场内人山人海，漫无目的跟人海乱行唔係办法，我哋整理C3展品同活动资料，针对唔同兴趣、财力嘅人士推介必睇/买项目，穷有穷玩，富有富玩，入场门票嗰$35（预售$30）实赚冇蚀。

高达迷、「高登佬」：限定模型同1:1雷神

高登巴打帮衬最多嘅玩具精品品牌首选实係Bandai，今次C3HK佢哋照旧有超大型展摊，位置係A-38/A-53，同时推出1只会场优先同2只会场限定嘅高达，包括1/100巴巴托斯 天狼型高达透明版、1/144 HG 高达RX78-2透明版同埋RG 1/144迷网高达电镀版，高达迷入场必抢。而A-43 SUNRISE喺2月11号（星期六）仲举办两节关于THE ORIGIN嘅分享会，请来两名製作人分享创作背后嘅故事，每节头50个参加者会有礼物收。

◆ 1/100巴巴托斯 天狼型高达透明版
◆ 1/144 HG 高达RX78-2透明版
◆ RG 1/144迷网高达电镀版
◆ A-43 SUNRISE有THE ORIGIN製作人分享会

除咗高达，有番咁上吓年纪嘅「高登佬」好多都锺意《高智能方程式》。A-20 MEGAHOUSE呢次就摆咗架1:1嘅超级雷神01，大家可以近距离欣赏，手头鬆动仲可以考虑买会场优先发售嘅超级雷神AKF-11 metallic version。

如果想支持吓本地产品，不妨去A-31 Asia Goal，买只先行发售嘅Ori Toy Acid Rain Puppet Container Guard香港版。细细只摆落唔阻掟，放办公室都问题不大，加上可动性高又精细，香港独有，绝对值得收藏。

后生一辈：必抢大热动漫周边+黏土人

C3场内不乏热门角色同作品嘅周边，例如好几个参展商都推出咗《Re:从零开始的异世界生活》嘅周边。A-25 TV TOKYO嘅$250福袋，包括纸袋、耳机、背囊同300cc玻璃杯一个，仲有拉姆雷姆两姊妹嘅正反面抱枕，丢你拉姆定雷姆任君选择。A-44角川亦于场内优先售卖「雷姆之日」B2挂轴。LoveLive最新作《LoveLive! Sunshine!!》水团喺A-2 BUSHIROAD除咗有等身大纸板影相，仲有多款精品，$90大匙扣属于优先发售款式。A-48 Aniplex亦非常update，因应《刀剑神域》剧场版「序列争战」推出相关挂画、手巾同卡套，全部都係C3先行发售。

◆ A-25 TV TOKYO有Re:0福袋、T及抱枕
◆ A-44角川「雷姆之日」B2挂轴，另有《你的名字》
◆ A-2 BUSHIROAD有LL水团周边
◆ A-48 Aniplex将现场发售《刀剑神域：序列争战》周边

玩game或者偏好同人作品嘅亦有货，A-10 PikattoAnime预定出售KEY社《Little Buster!》、《Angel Beat!-1st beat-》同埋东方嘅挂画加精品，摊内亦会展示多个着名插画师嘅画作。收开黏土人/figma就记住去首次参展嘅A-16 GOOD SMILE COMPANY兜个转，事关现场率先接受「黏土人 雪初音Twinkle Snow Ver.」、「figma雪初音Twinkle Snow ver.」、「舰队Collection黏土人 瑞鹤改」及「figma Saber/阿尔托莉亚・潘德拉冈[Lily] 第三再临ver.」预订。每日设限额，先到先得。

◆ A-10 PikattoAnime主打KEY社、东方
◆ 黏土人 雪初音Twinkle Snow Ver.
◆ figma雪初音Twinkle Snow ver.
◆ 舰队Collection黏土人 瑞鹤改
◆ figma Saber/阿尔托莉亚・潘德拉冈[Lily] 第三再临ver.

不课金主义：试打新game、睇《攻壳》漫画再抽奖

银根短缺者斋睇唔买之外，亦未至于冇其他细艺。A-47 BANDAI NAMCO Entertainment即场设置数十部机体，畀大家试玩《加速世界VS刀剑神域：千年的黄昏》、《刀剑神域：记忆重组》、《铁拳7》、《超级机器人大战V》等游戏。早前到港取景嘅电影《攻壳机动队》一样喺C3开档（A-23），展品包括原装漫画、特定版figure，参加活动仲有机会拎电影纪念品。唔啱嘅转番去A-43 SUNRISE，以大银幕重温多套新旧作品、欣赏插图都係唔错嘅选择。

动漫音乐/声优宅：做铁马打call组

讲到C3点少得主舞台活动，唔记得/刷唔到场内飞，照样可以喺外围铁马霸定靓位等打call睇show。嘉宾名单众多，惟有每日拣一个做重点推介。首先2月10号（星期五）4点[email protected]五名声优有歌舞表演，各位製作人应该到场支持吓。顺带一提A-47有官方演唱会萤光棒卖（注意：旧货嚟），未入手嘅不妨买番支。

◆ 五位出席声优：中村绘里子（声演天海春香）、仁后真耶子（声演高槻弥生）、田所梓（声演最上静香）、伊藤美来（声演七尾百合子）、渡部优衣（声演横山奈绪）

2月11号（星期六）就必选7点半开始嘅铃华优子SPECIAL LIVE，不时有巴打喺forum讨论佢担任主唱嘅和乐器乐团，今次佢以个人名义来港演出，冇成队band同净唱自己歌可能差啲，但有机会现场真係唔听？相信届时会献唱《SD高达G世代创世》嘅OP「永世のクレイドル」。

2月12号（星期日）的话就记住睇4点半、LoveLive μ's声优之一嘅饭田里穗，上年佢嚟过香港参加「Anison Dream Stage 2016」，门票极速售罄。而家竟然有免费睇嘅机会！佢同时会出席2点嘅「ULTRA HEROES & KAIJU GIRLS SPECIAL LIVE 」。

至于未买同买咗3月「Anisong Fantasy Live」嘅巴丝都必去A-49主办开嘅摊位，够胆大展歌喉参加唱K比赛，即可获橡胶手带一条，各时段得分最高者可以免费获得D区门票两张（每张价值$480）。持票者更可报名2月11号场内嘅春奈露娜击掌会，以及参加抽奖。临时发现军火萤光棒坏咗，去A-35 LUMICA买支24色LUMIACE 2 OMEGA又可以再战三百个回合。

C3日本动玩博览2017

日期：（五）至（日）

时间：12:00-21:00（五、六）/12:00-19:00（日）

地点：香港会议展览中心3号BCDE展厅

门票售价：预售$30、现场$35

（预售门票于各大OK便利店、7-11便利店、MCL院线、动漫世界及namco有售）